د خوست پخوانی والي او ښاروال د وظیفوي واک د ناوړه کارونې په تور محاکمه شول
د خوست پخوانی والي حکم خان حبیبي د ملا جان زوی او د دغه ولایت پخوانی ښاروال عبدالبصیر محمدزی د عبدالوکیل زوی نن سه شنبه د ۱۳۹۹ لمریز کال د کب پر ۲۶ د اداري فساد د لویو جرمونو پر ضد د مبارزې عدلي او قضايي مرکز استیناف محکمې له خوا محاکمه شول.
د موظف څارنوال د صورت دعوا پر اساس، د خوست د دخولي او خروجي دروازو مامورانو د باروړونکو موټرو د محصولي پاڼو په بدل کې له موټرچلوونکو څخه پنځه زره او ۵۰۰ افغانۍ اخیستې؛ خو په اصلي کُنډه کې يې یوازې ۵۰۰ افغانۍ لیکلې.
دغو مامورانو په خپل اعتراف کې ویلي، چې دا ناقانونه کار يې د ځینو ستونزو له کبله کړی. دوی ویلي، هره میاشت يې د والي او ښاروال په مستقیم هدایت د دغه ولایت مېلمستون لپاره ۷۰ زره افغانۍ د دغه ولایت ښاروالۍ مالي او اداري آمر ته ورکولې.
د قضيې موظف څارنوال دا دوسیه د تحقیق تر بشپړولو او اتهامنامې او صورت دعوا تر ترتیبولو وروسته د اسنادو او شواهدو پر اساس محکمې ته لېږلې او له قضايي پلاوي يې تورنو ته د جزا قانون د ۳۱۳، ۲۸۵، ۱۵۸، ۳۸ او ۳۹ مادو او د ښاري خدمتونو د محصول قانون د یوولسمې مادې او د جزا کوډ د ۱۷ مادې پر اساس د سزا غوښتنه کړې وه.
د اداري فساد لویو جرایمو ته د رسیدګۍ استیناف محکمې قضايي پلاوي د خوست پخوانی والي حکم خان حبیبي ته د الزام د کافي دلایلو د نشتوالي له کبله برائت او د دغه ولایت پخوانی ښاروال عبدالبصیر چې درې کاله او ۱۳ ورځې يې په بند کې تېرې کړې، کافي وبللې.
د یادونې وړ ده، چې د خوست پر پخواني والي او ښاروال سربېره د دغه ولایت درې کارکوونکي هم په دې قضيې کې د لاس لرلو په تړاو د عدلي تعقیب وړ بللي وو، چې د دوو کسانو په اړه د ابتداییه محکمې پر پرېکړې قناعت شوی او د یوه بل کس محاکمه، محکمې ته د نه حاضرېدو په دلیل بل وخت ته وځنډېدله.
دا په داسې حال کې ده، چې د اداري فساد د لویو جرمونو پر ضد د مبارزې عدلي او قضايي مرکز ابتداییه محکمې حکم خان حبیبي ته د الزام د کافي دلایلو د نشتوالي له کبله برائت ورکړی و، عبدالبصیر يې پر یوولسو میاشتو تنفیذي حبس او درې نور تورن يې پر ۱۴ کالو او شپږو میاشتو، ۱۲ کالو او شپږو میاشتو او پنځو کالو او شپږو میاشتو تنفیذي حبس محکوم کړي وو.
