یو کس بهر ته د پیسو د ناقانونه لېږد په تور په محاکمه شو
اکبر کاظمي د غلام حسین زوی، له هېواده بهر ته د پيسو د ناقانونه لېږد په تور، نن دوشنبه د ۱۴۰۰ لمریز کال د وري پر نهمه د اداري فساد پر ضد د مبارزې عدلي او قضايي مرکز له خوا محاکمه شو.
اکبر کاظمي ایران اسلامي جمهوري هېواد ته د ۸۶ زره ۹۰۰ امریکايي ډالرو، ۱۰ زره او ۴۴۰ د اماراتو د درهمو، ۱۵۰ کاناډايي ډالرو، ۹ زره ۹۰۰ ایراني تومانو او ۱۹ زره افغانیو د ناقانونه لېږد په تور د ۱۳۹۹ لمریز کال د لیندۍ پر ۱۵ د حامد کرزي نړیوال هوايي ډګر د مسافرینو د ګمرک د عمومي مدیریت د موظفینو له خوا ونیول شو او دوسیه یې د عدلي تعقیب او قضايي تعقیب لپاره لویې څارنوالۍ ته ولېږل شوه.
د قضيې موظف څارنوال، د دغه مرکز په ابتداییه محکمې هم د اسنادو له مخې اکبر کاظمي ته د پيسو د ناقانونه لېږد په تور له قضايي پلاوي د جزا کوډ د ۵۰۵ مادې پر اساس د سزا غوښتنه کړې وه.
د اداري فساد له لویو جرمونو سره د مبارزې عدلي او قضايي مرکز استیناف محکمې اکبر کاظمي د پيسو د ناقانونه لېږد په تور د جزا کوډ د ۵۰۵ مادې پر اساس پر اوو میاشتو تنفیذي حبس محکوم کړ.
دغه قضايي پلاوي د ۸۶ زره ۹۰۰ امریکايي ډالرو، ۱۰ زره او ۴۴۰ د اماراتو د درهمو، ۱۵۰ کاناډايي ډالرو، ۹ زره ۹۰۰ ایراني تومانو او ۱۹ زره افغانیو د مصادرې حکم هم صادر کړ.
د یادونې وړ ده، چې د دغه مرکز د ابتداییه محکمې له خوا هم د ۱۳۹۹ لمریز کال د مرغومي پر ۲۳ نوموړی پر اوو میاشتو تنفیذي حبس محکوم او د یاد شوي مبلغ د مصادرې حکم صادر کړی و.
