د ایران له زندانونو شاوخوا ۱۷۲۸ افغان بندیان افغانستان ته د لېږدولو لپاره تثبیت شول
د ایران د اسلامي جمهوري دولت په رسمي بلنې د ا.ا.ا لوی څارنوال په مشرۍ یو لوړپوړی پلاوی د ۱۴۰۱ لمریز کال د کب پر پنځمه چې د ۱۴۴۴ هجري قمري کال د شعبان المعظم له درېیمې سره سمون خوري، د ایران په زندانونو کې د افغان بندیانو د لېږدولو په موخه دغه هېواد ته لاړ او د نوموړي هېواد له چارواکو سره یې خبرې اترې وکړې.
د ا.ا.ا لوی څارنوال او مل پلاوي یې د عدلیې وزیر، د بشري حقونو او نړیوالو چارو مرستیال او د بندیانو د لېږد رییس، د قضایه قوې د بشري حقونو او نړیوالو اړیکو مرستیال، د جمهوري ریاست له مرستیال، کابل کې د ایران جمهوري دولت سفیر او د بندیانو چارو له چارواکو سره او قضايي قوې له برخو او بهرنیو چارو وزارت د کونسلۍ له برخو څخه لیدنې وکړې.
هغوی د ایران په زندانونو کې د افغان محکومانو د لېږد پر څرنګوالي او په بهر کې د هغوی د حقونو د ملاتړ او د ا.ا.ا او د ایران اسلامي جمهوري دولت ترمنځ د اړیکو د پیاوړتیا په موخه خبرې اترې کړې دي.
په دې لیدنو کې د ایران په ۲۱ ولایتونو کې د شپږ زره او ۶۲۰ افغان بندیانو له ډلې شاوخوا یو زر او ۷۲۸ افغان بندیان هېواد ته د لېږدولو لپاره تثبیت او وپېژندل شول.
دغه راز په ۱۴۰۱ لمریز کال کې په درېیو پړاوونو کې په ایران کې د یو زر او ۵۰۰ بندیانو لېږد زمانبدي شو، چې د هوکړې له مخې ښځينه بندیانو ته لومړیتوب ورکړل شوی دی. د ا.ا.ا پلاوي د ایران اسلامي جمهوري دولت له چارواکو غوښتنه وکړه، چې دې بهیر ته په راتلونکو کلونو کې هم دوام ورکړي.
د ایران اسلامي جمهوریت له ا.ا.ا پلاوي سره د شاوخوا څلور سوه بندیانو د لېږدولو چې په قصاص (اعدام) محکوم دي، په هغو مواردو کې چې د قضیې اړخ افغانان دي، له قضايي چارواکو سره له مجوز وروسته موافقت او تیاری وښود.
دغه راز د ایران اسلامي جمهوري دولت د هغو ۲۵۰ بندیانو چې پر اعدام محکوم دي او په تعزیري جرایمو په ځانګړې توګه د مخدره توکو په قاچاق محکوم دي، د مجازاتو پر تعدیل موافقت او د تیاری وښود.
په دې ناستو کې د ایران اسلامي جمهوريت ژمنه وکړه، چې د ا.ا.ا چارواکو له غوښتنې وروسته د زندانونو چارو ادارې د منسوبانو او کارکوونکو د ظرفیت لوړونې، د بندیانو د ساتنې او د بندخونو په چارو کې د تجاربو شریکولو ته تیار دي.
دغه راز د ا.ا.ا چارواکو په غوښتنه، ایراني چارواکو د ټکنالوژۍ سیسټمونو د پیاوړتیا، او د قضايي سیسټم د تجهیز او په دې برخه کې د تجربو شریکولو لپاره هم د تیارۍ ډاډ ورکړی دی.
ایراني چارواکو د کرنیزو برخو د تجهیز او د مخدره توکو د بدیل په موخه د اصلاح شویو بذري تخمونو د مرستې تیاری وښود. دا تیاری د افغانستان د ا.ا د مشرتابه له لوري د مخدره توکو د کرلو، تولید او قاچاق د منع کولو په موخه ښوول شوی دی.
دغه راز د ا.ا.ا پلاوي د ایران د جمهوري ریاست له مرستیال سره په لیدنه کې په ایران کې د افغان کډوالو ستونزې په ۱۰ شمېرو کې له نوموړي سره شریکې کړې او د هواري غوښتنه یې وکړه.
د یادونې وړ ده، چې د ا.ا.ا لوی څارنوال په مشرۍ پلاوي له لوري له ایراني چارواکو سره د شویو پرېکړو او مذاکراتو وروسته، د ۱۴۰۱ لمریز کال د کب پر ۱۵ د ایران په زندانونو کې د افغان بندیانو د لېږد بهیر پیل شوی دی.
په لومړي پړاو کې ۲۶۲ افغان بندیان د ایراني پلاوي له لوري د اسلام کلا بندر کې افغاني پلاوي ته وسپارل شول او دا بهیر روان دی.
