د لویې څارنوالۍ عالي شورا غونډه ترسره شوه
دغه غونډه نن د یکشنبې په ورځ د غبرګولي میاشتې په ۲۸مه نېټه د لوی څارنوال څارنپوه محمد فرید حمیدي تر مشرۍ لاندې په دارالامان کښې د لویې څارنوالۍ په ودانۍ کښې ترسره شوه.
د غونډې په پیل کښې د ۱۷ شمېرې وړاندیز په هکله چې د پنجشېر د استیناف څارنوالۍ ریاست مختلطه کمېټه د فواید عامې ریاست د سړک جوړونې پروژو او د لاجورد او زمرد ډبرو څخه کوم عواید راټولوي، په اړه بحث وشو.
عالي شورا پرېکړه وکړه، د اداري فساد د قضیو پېچلتیا په پام کښې نیولو سره، هغه ژمنې چې د هیواد د نافذه فوانینو په برخه کې اټکل شوې دي، کافي نه وي ؛ له دې کبله د سترې محکمې د عالي شورا عنواني ته یوه استهداییه دې ترتیب شي ترڅو د هغې وضاحت او لارښوونې سره سم په دې برخه کې قانوني اجراآت ترسره شي.
د ناستې په وروستۍ برخه کې د لویې څارنوالۍ د کنټرول او څارنې ریاست د اوپراتیفي پیسو د لګښتونو او د کارولو کړنلاره تر بحث لاندې ونیول شوه.
دغه کړنلاره د عالي شورا غړو له لوري یو ښه او اغېزمن نوښت وبلل شو. له بلې خوا عالي شورا پرېکړه وکړه چې یاده شوې کړنلاره د موظفې کمېټې له لوري چې د څیړنو په چارو کې د لوی څارنوال مرستیال څارنپوه نور حبیب جلال ترمشرۍ لاندې ده، د سمې کتنې وروسته دې په راتلونکې غونډه کښې عالي شورا ته وړاندې کړي.
د غونډې په وروستۍ برخه کې د احکامو د تنفیذ څارنوالۍ ریاست لخوا د ممنوع الخروجۍ وړاندیز په هکله بحث وشو.
عالي شورا پرېکړه وکړه چې د اتباعو د حقونو د ساتنې لپاره د دغې موضوع متن د سمې او قانوني کتنې وروسته، د لویې څارنوالۍ عالي شورا له خوا دې تصویب شي او د لوی څارنوال د لاسلیک نه وروسته دې اړونده مراجعو ته واستول شي څو پدې هکله اړین قانونی اجراآت ترسره شي.
