په لوګر ولایت کې یو څارنوال شهید شو
د لوګر ولایت د ابتداییه عسکري څارنوالۍ د تحقیق څارنوال ډګروال محمود درانی د ۱۳۹۷ کال د غبرګولي پر دویمه د حکومت د مخالفانو له خوا په کمین کې شهید شو. په دې پېښه کې د لوګر ولایت د نظامي څارنوالۍ رئیس سلام خان ټپي شوی او موټر چلوونکی يې شهید شوی دی.
دا پېښه د لوګر ولایت په مرکز پلعلم پورې تړلې سیمه کلنګار کې تر غرمې مخکې داسې مهال شوې، چې نوموړي کسان دندې ته پر لار وو.
لوی څارنوال څارنپوه محمد فرید حمیدي د دغې پېښې په تړاو په یوه پیغام کې خواشيني څرګنده کړې او د نوموړو شهادت يې د عدالت د تأمین په لاره کې قرباني بللې ده.
د هېواد لوی څارنوال همداراز ويلي: «څارنوالان غیر سیاسي کارکوونکي دي او په پوره استقلالیت او بې پرې توګه عدالت تأمینوي.» نوموړي د دغې پېښې د عاملانو د مجازاتولو په برخه کې د هر ډول هڅو ژمنه هم کړې ده.
د یادونې وړ ده، چې په یاده شوې پېښه کې د نظامي څارنوالۍ رئيس روغتیايي حالت ښه ښودل شوی او ژر به خپله دنده پيل کړي.
