د ټاکنو د خپلواک کمېسیون د دارالانشأ پخوانی رئیس او پنځه کارکوونکي ممنوع الخروج شول

Ago

دغه کسان د کشفي ادارو له خوا د ټاکنو او د ټاکنیزو  شکایتونو د خپلواک کمېسیون د پخوانیو غړو او رئیسانو په ګډون له واک څخه د ناوړه ګټې اخېستنې قضیه کې د لاس لرلو په تور، چې دغې ادارې ته رسېدلې وه او د ټاکل شوي پلاوي له خوا تر کار لاندې ده، ممنوع الخروج شوي دي.

په یادو شویو کسانو کې د دارالانشأ پخوانی رئیس، د عملیاتي چارو مرستیال، د معلوماتي ټکنالوژۍ رئیس او د ټاکنو د خپلواک کمېسیون د ساحوي عملیاتو رئیس شامل دي.

دا په داسې حال کې ده، چې په دې برخه کې په جدي او هر اړخیزه توګه څېړنې روانې دي او د افغانستان د اسلامي جمهوري دولت لویه څارنوالي ډاډ ورکوي، چې دغه قضیه به هم د نورو قضیو په شان په عادلانه، خپلواکه او بې پرې توګه د قانون د احکامو په رڼا کې وڅېړي او د هغه شواهدو، اسنادو او مدرکونو پر بنسټ چې د ټاکل شوي پلاوي په لاس کې دي، د دوی د مسؤولیت او نامسؤولیت په اړه به قانوني پرېکړه وکړي.