لویې څارنوالۍ په تلې میاشت کې د نشه یي توکو د قاچاق ۲۵۶ قضیې څېړلې دي
د افغانستان د اسلامي جمهوري دولت لویې څارنوالۍ، انساني کرامت ته په درناوي او د هېواد د نافذه قوانینو او هېوادوالو د شرعي او بشري حقونو په رعایتونې سره د ۱۳۹۸ کال په تلې میاشت کې له نشه یي توکو سره د مبارزې ځانګړې څارنوالۍ ریاست له لارې، د نشه یي توکو د قاچاق ۲۵۶ قضیې په بې پرې او خپلواکه توګه ثبت کړې او څېړلې دي.
له یاد شمېر قضیو څخه، ۱۲۹ قضیې د اتهام نامو له ترتیب وروسته ابتدایي څارنوالۍ ته استول شوې او په اړه یې ۱۱۲ کسان تر توقیف لاندې دي. له دغو کسانو څخه ۱۱ کسان د عامه خدمتونو مؤظفین او یوه ښځه ده.
د نشه یي توکو د قاچاق له یاد شمېر قضیو څخه، ۱۰۰ قضیې په ابتدایي محکمه کې او پر ۴۶ په استیناف محکمه کې پرېکړه شوې چې د ۷۵ یې محاکماتي مرحلې بشپړې شوې دي. له دغو قضیو ۴۳ نورې قضیې د ابتدایه، استیناف او تحقیق څارنوالۍ تر کار لاندې دي.
د یادو جرمونو د ارتکاب له امله ۲۱ موټر، ۱۴ میله بېلابېل ډوله وسله او ۱۲۳ مبایلونه ضبط شوي او ۱۶۹ زره او ۳۱۰ افغانۍ په لاس راغلې، چې د دولت په پرېکنده حساب بانک ته سپارل شوې دي.
