په افغانستان د جرمي قضیو د ثبت مدیریت سیسټم (CMS) نوې نسخه معرفي شوه
په همدې موخه یوه غونډه د لویې څارنوالۍ د قضايي تعقیب چارو مرستیال ډاکټر غلام حیدر علامه په مشرۍ د تدقیق او مطالعاتو، د احکامو د تنقیذ او د حبس د بدیل عمومي رئیسانو، د جرمي قضیو د ثبت رئیس او ځینو نورو مسؤولانو په ګډون د ۱۴۰۰ لمریز کال د وري پر ۲۶ ترسره شوه.
ښاغلي علامه په دې غونډه کې وویل، چې په عدلي او قضايي مرکز کې د قضیو د ثبت سیسټم زیات ارزښتناک دی. د نوموړي په باور، د دغه سیسټم سمه کارونه د عدالت تأمین او په قضايي چارو کې لا روڼتیا ته زمینه برابروي.
په ورته وخت کې د قضیو د ثبت مدیریت فني مسؤول د دغه سیسټم دویمه نسخه ګډونوالو ته معرفي کړه. نوموړي زیاته کړه، چې د قضیو د ثبت سیسټم مدیریت نوې نسخه د پخوانۍ په نسبت ښې ځانګړنې لري.
په دې ناسته کې د قضیو د ثبت سیسټم د تطبیق په برخه کې د ستونزو او له دغه سیسټم څخه د ښې استفادې لازمې حللارې پیشنهاد او پر تطبیق يې ټینګار وشو.
ښاغلي علامه د دغې ناستې ګډونوالو ته هدایت ورکړ، چې وړاندیز شوې حللارې په دقیقه توګه تطبیق کړي، چې د دغه سیسټم رول لا اغېزناک شي.
د دغې ناستې ګډونوالو پرېکړه وکړه، چې د قضیو د ثبت مدیریت سیسټم د ښې استفادې په موخه به د اړوندو مسؤولانو ترمنځ په هرو ۱۵ ورځو کې یوه غونډه جوړوي.
